Ermetico

Fusse un poeta…
Ermetico,
Parlarìa de l’Eterno:
De la coscienza in mi,
De le stele su mi,
E del mar che voleva e no’ voleva
(Ah, canagia d’un mar!)
Darme le so parole.

Ma son…
(Parché no’ dirlo?)
Son un poeta.

E ti ghe gèri tì ne la me barca.

E le stele su nù ghe sarà stàe,
E la coscienza in nù,
E le onde se sarà messe a parlar,
Ma ti-ghe-géri tì ne la me barca,
(E gèra fermi i remi).
In mezo al mar.

[Giacomo Noventa, Fusse un poeta…, cit. in: Franco Loi, Noventa, la poesia la poetica, il sacro, in: Noventa eretico del Novecento, Brescia, Quaderni della fondazione Micheletti 10-1999, pag. 25]